وايلي كلشي و لا كغني على الدين و رمضان و داك
وايلي كلشي و لا كغني على الدين و رمضان و داك شي
بقلم : المختار العروسي من طنجة ل ا”لعرائش أنفو”
تنشر بالموازاة على بني مكادة نيوز
و غير سموح لي زعم و خا ناس ولات مقلقة مزيان من هد شي لكنكتب و كقولك راني كنهجم عليهم،بلحق مشي مشكل انا فقط كنبغي نطراح بعض لمشاكل و تناقضات لكنشوف راسي عيشينها و كنحاول نتواصل معاكم لأنكم عزاز علي و هد لكلام راه ما عيقلقني ما عيوقفني على لكتابة.
لمهم ليوما بغيت نتكلم على واحد ظاهرة غريبة بزاف، هي كلشي ولا كغني أغاني دينية و أغاني على شهر رمضان لمبارك،و بغيت نسطى مزيان حيت ما فهمت حتى وزة،واش لمغنيين ندموا على لفات و بداوا كغنو على الدين و سلاو مع داك شي لقديم أو هي موضة و صافي و الله و اعلم هد شي صعيب علي و خلني ما نبقى نفهم والو،و سؤال هذا و شمن سؤال.
و الله لعظيم سؤال صعيب حيت كجبر دابا لمغني كعمل فوجهوا لحية فحل داك شارطة ديال زروا مرازية مزيان،و السبيح فيدوا و كبدى يغني،و فيهم من قالك راه تاب و الأغاني حرام و هو عيبدا يغني غير أغاني دينية بلحق فين كغني فمهرجان فحل موازين،و لنموذج هو داك لكغني أبنت ناس أنا فقير ……………..
بلحق هد شي كامل يدوز و لصافي قضى معايا ضرب دين دموي بلكاو و جابني أرضا دكا هو لفنان الشعبي محبوب لكاس و لقرعة و فلحفاري طنجة كلها دازهوم “عادل لميلودي”و داك الأغنية ديالوا على رمضان بغى يعمل فحل ماهر لزين بلحق بالشعبي،راجل كغني على رمضان بلحق لفيه ما يهنيه كتهز بحدوا فحل لفيه بوهزهاز و ايوا الله يشافيه و يعافيه و صافي.
أما دوزي الله يعطيه الصحة أغنية كاملة فيها كلمة رمضان يا رمضان و ضرب ليك واحد تقريعة ناري فكرني بداك ملعبي ديال أرجنتين فيرون،و واحد لحية يجيب لك الله سيد يا الله رجع من سوريا و كان كجاهد مع جماعة النصرة،أما واحد لبيسة فلخضر ناري سيد مأثر بمسلسل حريم السلطان و حتى بنور و مهند ليها مشى صور فيديوا كليب فتركيا،و من بعدها عيعمل مفاجأة لمغارية بديوا ديالو مع دنيا باطمة الله يعطيك الصحة و صافي ابا دوزي وحنا غير كنقشبوا معاك و صافي.
و راه الميلودي ميلودات هما و دوزي دوزيات هما ،و غدا نسمعوا الداودية من عطيني صاكي بغى نماكي،للأغنية الله يا الله اهدينا يالله،زعم عاد دخلت للإسلام و مورها القرعة و الكاس كعدلوا راس اه القرعة و لكاس كعدلو داك راس،وداك لمزيون شحال ما كبر فلعمر كصغر فوجهو،و فلباسوا عرفتوا على من كنهدر على داك لخلق فصويرة و قالك ناس ديال اسرائيل كرام معه على حسب شي فيديوا سبق ليا شفتو حتى هو كمشي لمصر الراعي الأول لإسرائيل و كغني أغاني دينية،غدا يغنيلك شي أغنية على لكرامين معه و يجيب ليها شي سند ديني.
الحاصول لشاف شي حاجة يقول الله باقي ستر و لفهم شي وزة ها لعار لما يجي يشرح ليا و يحارب فيا الأمية و يدي فيا شويا ديال الأجر العار.