العروسي – شكون هاذ بوجلابة

العرائش أنفو

الــعــروســـي – شكون هاذ بوجلابة

الــگــرفــطــي – آآآو , ما عرفتهش أ صااااحبي , تهدر من نيتك ؟؟

الــعــروســـي – والله ما عرفته , قول لينا شكون , بلا ما تبقى تفهم علي

الــگــرفــطــي – هادا أ صااحبي , راه الفقيه , القاضي,المجاهد , أسد الريف, محمد بن عبد الكريم الخطابي

الــعــروســـي – كان مجاهد ؟؟

الــگــرفــطــي – واه أصاحبي. هذا هو بطل معركة أنوال ضد إسبانيا, مات فيها أكثر من 15.000 عسكري ديال الصبليون من أصل 25.000 ,كانت أكبر هزيمة في تاريخ الحروب بين الشمال و الجنوب و ريافة وجبالة كانوا غي قلال , ما واصلينش 2.000

الــعــروســي – الله أكبر . و دابا فينو, باقي حي ؟؟

الــگــرفــطــي – واه , حي عند الله تعالى , حيت مات شهيد, والشهداء هم أحياء عند ربهم يرزقون

الــعــروســي – الله يرحمو و يرحم كل أمة محمد صلى الله عليه وسلم. فين كاين القبر ديالو ؟؟

الــگــرفــطــي – ف مصر

الــعــروســي – ما تهبلنيش أ صاحبي , هادا كان يجاهد مع المغاربة , ولا مع مصريين ؟؟ كيفاش مدفون ف مصر ؟؟ ما لقاولوش بلاصة ف المغرب ؟؟

الــگــرفــطــي – بحال داك الشي , من بعد 5 سنين ديال الهزائم ,طلبت إسبانيا الدعم من فرنسا ! و حاصروه ب نصف مليون جندي مستعملين الغازات السامة, فقرر الإستسلام , كي لا يباد شعبه …فخيروه المنفى , وآختار مصر, ليعيش بقية حياته , حتى مات ف 63

الــعــروســي – ياك قلت ما مات حتى 63 , و المغرب “استقل ف 56 ..علاش ما رجعش يكمل حياتو ف المغرب ؟؟

الــگــرفــطــي – وا صاحبي ندمتنا علاش جبدنا الموضوع !! ما رجعش للمغرب , حيت دوك للي نفاوه في وقت الإستعمار, هما للي بقاو حاكمين من بعد الإستقلال

الــعــروســي – ما فهمت حتى لعبة ,,

الــگــرفــطــي – سعداتك , حيت إلى فهمت و بقيت تفكر ف هاد الشي , راه غادي تسطى, حسن ليك ما تفهمش

الــعــروســي – قول لي هاد الشخصية , أسطورة , و أنا قلتلك ف الأول , شكون هاد بوجلابة

الــگــرفــطــي – راه ما كاينش غي هو .. كاين حتى الخضر غيلان , وموحا أوحمو الزياني , و الحنصالي , مربيه ربو وبزاف منهم

الــعــروســي – هاد الخضر غيلان و موحا و أحنصال فين كانو ؟؟ ف الثورة الجزائرية ؟؟

الــگــرفــطــي – لواه كانوا فالثورة الإيرانية , راه كاملين مجاهدين مغاربة , غي كل واحد فيهم فين جاهد , شي فالريف , شي فجبالة , شي فالأطلس , شي فالصحراء

الــعــروســي – راك غي تكذب عليا !! أنا جامي سمعت شي 1 من هادو كاملين !! أنا نعرف بلي محمد الخامس و علال الفاسي هما للي جابو الإستقلال. غي ب جوج بيهوم. ما معاهم حد.