خبر وشمن خبر! هاد القضية ديال “مجموعة الخير”
العرائش أنفو
خبر وشمن خبر! هاد القضية ديال “مجموعة الخير”
في المغرب القضية ديال “مجموعة الخير”تعتبر أكبر عملية نصب شبكي ما زال عندها خيوط كتخلع. هاد الموضوع هضرنا عليه شحال من مرة، وكانت عندي اتصالات مباشرة مع ضحايا د هاد المجموعة. ولكن كيف كنعرفوا، في المغرب القضاء قام بالواجب ديالو، أما هنا في برشلونة، وبالضبط في ماتارو و سان بوي وبعض المناطق الأخرى، القضية بقات في الهواء بسبب عدم توفر الأدلة الكافية.
هاد مجموعة الخير كانت في الأصل عبارة عن نساء عملوا ديك المسألة ديال “الدارت”، كيجمعوا الفلوس ويدوروا بيها من امرأة لأخرى على حسب لي جات في النوبة ديالو. وللأسف، تم سرقة ملايين الدولارات، واللي بقا ينتظر باش توصلو ديك البركة لقى راسو في والو. وما علينا، كاينين شي بعضين لي كانت تربطهم علاقة جمعوية مع بعض الجمعويين في الحقل المغربي، يعني الوزن موجود والمحسوبية حتى هي حاضرة، خصوصاً أن بعضهن كان عندهم اتصالات مباشرة مع شي ناس ويمكن كان هناك تبييض الأموال حيت الفلوس لي كانت دارت فيها كانت صحيحة بزاف.
واليوم توصلت بخبر اعتقال إحدى الركائز الأساسية ديال هاد المجموعة، بحكم أنها بغات تعمل عطلة في المغرب، وغير وصلت تم اعتقالها مباشرة وها هي حاليا رهن الاعتقال بسبب الشكايات الكثيرة من نساء تم النصب عليهم. والشيء لي خلاني نخرج ونكتب اليوم، هو أنه كاين معلومات كتقول بلي هاد الناشطة داخل المجموعة يمكن سيتم إطلاق سراحها بحجة عدم توفر أدلة كافية، وكذا حيت شي وحدة قامت بالتنازل والتعويض للخسائر لي وقعات.
وأنا عارف بلي كاين علاقات مع بعض المسؤولين هنا في كتالونيا أو لي كانوا هنا، ويمكن عندهم اتصالات هي لي غادي تخدم باش تخرج. وإذا كانت هاد المسالة كيفما كنقولوا، فسلامي ليها ولصديقاتها.
المهم أنا أناقش ما يدور، وما دار من قبل، وما الذي يمكن أن يحدث. عارف بلي هاد المواضيع فيها غير المشاكل، والصراحة حنا عليها عايشين، غير المشاكل. وأنا كنقول علاش الصحافة المغربية باسبانيا وبالضبط في كتالونيا ما شفناهاش تناقش قضايا الساعة سبتة والمهاجرين، حيت القضية فيها كلشي فيه الفز ولي فيه الفز يمكن غادي توصليه النوبة غير وكان عندكم زهار حيت سيادكم لي علموكم تختبؤون وراءهم.