خلف ستار الجمعيات: من يغذي التطرف في كتالونيا؟
العرائش أنفو
خلف ستار الجمعيات: من يغذي التطرف في كتالونيا؟
أمين أحرشيون
ملي كنلقاو كتالونيا ك تتصدر القائمة في اعتقالات التطرف، هنا خاصنا نوقفو ونطرحو أسئلة حارقة بعيداً عن لغة الخشب. واش هاد الجمعيات والمؤسسات الدينية اللي ديما ك تشيد براسها وبخدمتها للحقل الديني قايمة بالدور ديالها فعلاً، ولا ولات مجرد “واجهات” ك تبيع الوهم؟ الحقيقة المرة هي أن هاد “الريادة” في الاعتقالات ك تكشف لينا “عورة” التدبير الديني اللي ك يسيرو ناس ربما ك يهمهم الحفاظ على الكرسي والمصالح الشخصية تحت الطاولة أكثر من سلامة المنهج.
الخلل واضح ملي كنلقاو شيوخ ك يجيونا من المشرق بصفقات غامضة وشراكات مشبوهة مع بعض الجمعيات المحلية، وك يوزعو فكر دخيل ك يعزل الشاب على المجتمع اللي عايش فيه بمنطق “الحلال والحرام” الضيق. هاد “الاستيراد” الفكري هو اللي ك يخلق الفجوة، وكيخلينا نتساءلو: شنو هو الثمن اللي ك تدفعو هاد المؤسسات مقابل التمويلات والمصالح الضيقة؟
برافو للسلطات الإسبانية اللي قايمة بالواجب وأكثر، واليقظة ديالها هي اللي ك تمنع الكارثة قبل ما تقلب الموازين، ولكن هاد المجهود الأمني ك يخلينا نشوفو الفشل الذريع ديال اللي ك يدعيو التأطير. ما يمكنش نبقاو نغطيو الشمس بالغربال ونقولو “العام زين” والأرقام ك تقول العكس، حيت الأمن الفكري ديال المجتمع ماشي لعبة في يد اللي ك يقلبو على “الهمزة” باسم الدين. جا الوقت باش نوضعو النقط على الحروف ونعرفو شكون اللي ك يبني وشكون اللي ك يهدم من الداخل.