” في قلب الغربة: من يحمي المستضعفين من منطق “البلطجة”؟
العرائش أنفو
” في قلب الغربة: من يحمي المستضعفين من منطق “البلطجة”؟
أمين أحرشيون
واقعة مؤلمة عشناها اليوم في حي كالينكلادا كتحبس الأنفاس وكتقصح القلب، وكتخلي الواحد يضرب كف على كف من هول ما شاف. السيد الضحية، الله يعمرها دار وعلى قد حالو، كيعاني من إعاقة في رجلو وكان كيسابق الزمن باش يوجد لمراتو تلتحق بيه وتعيش معاه في أمان. علم الدراري اللي كاريين معاه هادي ربع شهور باللي في شهر ماي خص الدار تخوى وتصباغ وتوجد لمولات الدار، ولكن بنادم فين كيوصلو الطمع وقلة النفس مابقاش كيعرف حدود. واحد فيهم كيسحاب راسو “رانبو” ديال الحومة وباغي يفرض القوة في ملك لغيرو، والآخر اللي كيتخبع مورا المظاهر صدق هو مول الفعلة الخايبة والمدبر الحقيقي لهاد الغدر.
هاد الناس ما احترموا شيبة، ما احترموا عجز، وما احترموا حق الجوار اللي وصى عليه الدين والإنسانية. الهجوم اللي وقع اليوم كان وحشي لدرجة أن السيد لقى راسو بين يدين الإسعاف والبوليس والدار مقلوبة مرونة، في مشهد كيسيء لكل قيم العيش المشترك. الحاجة الوحيدة اللي كتفرح وسط هاد الروينة هي الموقف النبيل ديال الجيران المغاربة ولاد الأصل، اللي شهدوا بالحق وما سكتوش على الظلم، وحتى الطاقم الطبي اللي فيه شباب كيشرفونا في الغربة بمعاملتهم الراقية.
من بعد ما فاق السيد من الغيبوبة ودار الشكاية ديالو، رجعنا كنظنوا باللي الأمور هدات، ساعة الغدر مازال مستمر والوقاحة وصلت لدرجة فرع الباب وتحدي الجميع. هاد الواقعة كطرح سؤال عميق: واش هادي هي العيشة اللي بغينا؟ واش هكذا ولينا كنفكروا في بعضياتنا في بلاد الناس؟ الدنيا ولات غيبة وكل واحد وشنو في راسو، ولكن القانون كاين والحق كايعلى ولا يعلى عليه.
الشرطة المحلية والمؤسسات كيحاولوا يتعاملوا بمنطق إنساني وتواصلي بحكم أن الأطراف من نفس الجنسية، ولكن اللي غايب عليهم هو أن هاد النماذج معندهاش حس الوطنية ولا الانتماء. هادو ناس عايشين وسط أي وطن بأسلوب فكري موروث مبني على عقلية سلطوية تحكمية، وتعصب قبلي كيجري في العروق وكيغطي على أي منطق قانوني أو أخلاقي. الشرطة حاولات تشرح الموضوع من كل جانب وتعطي كل حق حقو على حسب ما قيل لها، وهنا القصة كتولي في مهب الريح حيت ماشي كلشي صادق في كلامو، وماشي كلشي باغي الخير للبلاد اللي كياكل من خيرها وكيعيش فيها. الله يحفظ الجميع من شر الخلق ومن هاد النماذج اللي كيتنفسوا الغدر وكايوسخوا صورة مجتمعنا.