الهجرة ماشي ديما هي “الهروب من الجوع”.. الهجرة هي تقلب على “راسك”
العرائش أنفو
الهجرة ماشي ديما هي “الهروب من الجوع”.. الهجرة هي تقلب على “راسك”
أمين أحرشيون
بزاف دي الناس غالطين فاش كايسحاب ليهم بلي أي واحد جمع قشيوشاتو وخلا بلادو، راه هارب غير من الجوع ولا حيت ملقاش ما ياكل. هادي نظرة ناقصة بزاف، وكاتحصر بنادم غير فكرشو.
الحقيقة هي بلي ماشي كاع اللي خرج من دارو كايقلب على طرف د الخبز. كاين اللي عايش بيخير فبلادو، وعندو كاع الإمكانيات، ولكن عندو “جوع” من نوع آخر: جوع العقل والروح. الهجرة في الأصل هي محاولة باش بنادم يلقى راسو، ويقلب على عقلية واقعية كايحترم فيها ذاتو وأفكارو.
صعيب بزاف تعيش فوسط ناس الهم الوحيد ديالهم هو يهربوا من الجوع المادي، حيت الجوع أنواع. كاين اللي كايهاجر حيت باغي يعيش فواقع كايشبه ليه، واقع يقدر يبني فيه شخصيتو بعيد على الضغوطات اللي كاتخنق الإبداع.
الهجرة كانت من زمان ومعمرها ما غاتحبس، حيت هي جزء من الحياة. بنادم كايتحرك باش يكتشف أشنو كاين مورا الحدود، وباش يلقى داك التوازن اللي ملقاهش فمحيطو. حنا مكنهاجروش ديما باش نعمرو كرشنا، حنا كنهاجرو باش نعطيو لعقلنا الحق يعيش الواقع اللي كيستحق.