ها الانتخابات جاو بالسلامة

العرائش أنفو

ها الانتخابات جاو بالسلامة

سعيد ودغيري حسني

ها الانتخابات جاو بالسلامة ،هاهما جاو بالسلامة ،جاو راكبين فوق الوعود ، ومعلقين الأمل فالكلام ،وجايبين معاهم السلامة .نهار الحملة ،كلشي كيعرفك ،كلشي كيسول عليك ،كلشي باغي يسمعك ،
حتى اللي عمرّو سمع بيك ،كيولي يقول ،آخويا فين كنتي هاد المدة؟ ، والمرشح كيقول ،حنا ولاد البلاد ،وحنا عارفين البلاد ،وحنا غادي نصلحو البلاد ،والمواطن ساكت ،كيشوف ،وكيقول فخاطرو:الله يجعل هاد المرة ،ماشي غير هضرة ديال الانتخابات.

كيعطيوك البرنامج ،مكتوب مزيان ،فيه المدرسة ،والصحة والشغل ،والسكن ،والطريق ،والكرامة ،حتى البحر إلا بغاو ،كلشي غادي يتصلح ،وكلشي غادي يتحل ،غير واحد الحاجة ما كيقولوهاش:إمتى؟ ،حيت «غدا» ،
كلمة واسعة ،كتدخل فيها سنين ،والمواطن ما عندوش رفاهية الغد ،عندو الكرا ، وعندو الضو ، وعندو الما ،
وعندو مصاريف الدار ،وعندو ولد باغي يخدم ،وبنت باغية مستقبل .

ومن بعد ،كتدوز الانتخابات ،الصندوق كيتسد ،والأصوات كتتحسب ، والصور كتنتاشر ،والناجح كيطلع ، والمواطن؟ ،كيهبط للسوق ،يكمل حياتو ،بحال إلا ما وقع والو ،ولكن المواطن المغربي ، ماشي ساذج ،
يمكن يسكت ،ولكن كيشوف ،يمكن ينسى الاسم ،ولكن ما كينساش الوعد ،ويمكن ما يهضرش ، ولكن نهار الحساب ،كيعرف فين يحط الورقة .

لهذا نقول: ها الانتخابات جاو بالسلامة ، مرحبا بيهم ، ولكن مرحبا أكثر ، بالمسؤولية ،حيت السياسة ماشي غير ،ميكرو وصورة ،ولا يد كتسلم ،ولا كتاف كيتصافحو ،السياسة خدمة ، واللي دخلها خاصو يعرف أن الكرسي ماشي امتياز الكرسي امتحان والصوت ماشي غنيمة ،الصوت أمانة ،والوطن ماشي حملة انتخابية ، الوطن عمر كامل واللي بغا يخدم البلاد ، ما ينتظرش الانتخابات باش يقرب للمواطن ، يقرب للمواطن باش يعرف كيفاش يخدم البلاد.

وهادي هي الحكاية ،وها الانتخابات جاو بالسلامة ،واللي عندو كلمة يقولها ،واللي عندو خدمة يديرها ،واللي عندو ضمير ،يخليه صاحي.