مسرحية الدمى ومزبلة التاريخ

مسرحية الدمى ومزبلة التاريخ

العرائش أنفو

أمين أحرشيون

​شي برلماني وشي إسلامي، وشي مسؤول وشي قاري وشي خاوي. شي لاعب وشي باغي يلعب، وشي حشيها لشي وشي راقص على جراح شي. الدنيا ولات بحال شي سوق خانز، كلشي فيه مقضية وحاجتو فيه محشية، وكل واحد حاسب راسو هو مول الفز وهو اللي ضابط اللعبة.
​بنادم سحاب ليه راه دايم فيها، وباغي يفصلها ويخيطها كيف بغا هو. كينسى بلي هاديك الكرافاطة ولا داك المنصب ولا ديك الهضرة المعسولة، ما هي إلا صباغة دغيا كتقشر. كاين اللي لابس عباءة التقوى والداخل غابة ديال النفاق، وكاين اللي قاري الكتوبة وفهمو خاوي من الإنسانية، غير كيزوق الهضرة باش يغطي على العيب.
​وفالحقيقة، وراك غير دمية، لا أنت لا غيرك. لا حياتك صافية ولا أنت فيها إنسان بصح. راكم غير دمى كتحركها خيوط الطمع والوهم. كتحسبو روسكم حاكمين، وأنتما غير مسيرين فهاد المسرحية اللي النهاية ديالها وحدة. اللي كيحفر لغيرو، واللي كينافق خوه على قبل درهم ولا كرسي، راه غير كيزيد يغرق فديك الوحل.
​خطيك باللعب يا الأخطبوط راه ريحتك عطات ومزال غادي تعطي، حاسب راسك دايم في الدنيا وفي الأخير إذا حفرتي حفرة، كن على يقين للي بعدك غادي يطيحوا فيها، حيت أيامك معدودة والعيب والتشايطين عندهم نهاية ونهايتك حتما غادي تكون أضحوكة، هذه لأصحاب التمار والحليب ولا تنسى القاعدة بالليل، ولا تنسى العاشق الحوجرين وللي يعشق العشق والغرام وبلا منزيد ليك… ريحتكم عطات وباركة عليك من الخداع راه فيه وفيه.
​لاعبينها لعب وحاسبينها دايما، راك شريفتي أنت وهما، وجمعتي حتى عيبتي، وفي الأخير مزبلة التاريخ غادي تكت ليك كتاب. لا من يرحم للي جاي ولا من يحب للي ضحيتي وخدعتي ونافقتي وبيعتي ناس غير على جوج دراهم، في الأخير إلى مزبلة التاريخ. السياسة حساسة والحساسة فيها وفيها، وياما قالوا عليها راها زاهيا وياما قلنا راكم خداعا.”