قطار الحياة و “الراديو ديال المغاربة”: ملي العبادة كتولي قشور واللسان مبرد للنميمة

العرائش أنفو
قطار الحياة و “الراديو ديال المغاربة”: ملي العبادة كتولي قشور واللسان مبرد للنميمة

إمين أحرشيون

راك فالتنوين… غادي فحالك ف “قطار الحياة”، كتعيش دقيقة بدقيقة، وكل محطة وعقبتها، كيف ولفنا. فداك اللحظة، كلشي ساكت، كلشي ناعس، كلشي كيسمع لعظامو، وكلشي داير السماعات فودنو باش يهرب من الصداع ويسمع لراسو، غير وكان مع خوتنا ما بقا هدوء الصباح. والعفو مع “خير أمة”، وما أكثرهم، والأمية فيهم ساكنة ومعششة فالعقول قبل السطور.
كتسمع واحد النقاش حامي الوطيس بين من؟ بين “الأخوات العفيفات”، وأي أخوات؟ أمهات مغربيات، المفروض فيهن الوقار والحكمة. نقاش بالعلالي، المهم الميساج واصل للي يسمع وللي ما يسمعش، بحالا حنا العرب بوحدنا للي فاهمين الطرح وعارفين “منين كيتأكل الكتف” فالهضرة ديال الناس.
المضمون؟ واضح وباين… “القيل والقال والنميمة الخبيثة” هي الطريق للي شادين، والموضوع؟ فلانة آش دارت لفلان، ولد فلانة راه فالحبس وهي كتقول للناس راه ففرنسا… “راه راجلي للي قالها ليا، لا راجل فلانة للي فالحبس”.
شوية ويدوزو لنقاش آخر: “شفتي فلانة؟ عامين وهي ف “الباخا” (الإجازة المرضية) كانت غير كتجمع الحوايج وكتحددهم وتقابل الشارفة، ساعة دارت ليهم “الباخا” ودبا خدامة “فالنيكرو” وتخلص على “الباخا”!”. إييه، وحكّااا، سمعتي شنو وقع لداك الراجل د فلانة؟ دابز مع خوه على سّبّة د مراتو، وجات الأخرى قاتليها لا، على حقاش مرات خوه قالوا عليها قبيحة وتحكم فيهم كلهم!
دبا هادشي كامل، يمكن حتى أنا دخلت فالنميمة غير باش نعطيكم المثال… المثال ديال “الأخوات العفيفات” و”زوجي قرة عيني” و”زوجتي صالحة وأنا صالح” وبجوجنا غاديين للجنة! هادا غير جزء بسيط من الفكر د بعض “الأخوات”… وداك للي جالس فالقهوة من الستة د العشية حتى لصلات العشا، ويدخل للدار ويقول “اليوم أكملت لكم دينكم ورضيت عليكم يا أبنائي”.
العرب، النميمة والنفاق كينخر فيهم، وأهم حاجة عندهم هي شكون داوي على الآخر وشكون عارف كثر من الآخر. شحال من راجل ولا بحال المرا فالقهاوي، جالس غير يوصل الأخبار وينشر عقلية القطيع، وهو أصلاً “داوي خاوي”.
هادا هو المشكل الكبير فالفكر الإخواني، صحاب “الروقعة على الشعار”… وداك خونا للي جالس فالقهوة تابع هادي دخلت وهادا دخل، ومن بعد ينوض يقول ليك “هيا بنا نصلي المغرب”.
لازم الواحد ينقي أفكارو من أمثال الرجال للي رجعوا كيف النساء، وداك النساء “الأخوات المحجبات” للي رجعوا كيف سي عبد الجليل ما يدي ما يجيب، غير تابع ومتبوع، وراجلها قاضي صوالح فالقهاوي، عايش بالكذوب وفي الاخير يقولك حنا خير منهم
باش بالنفاق .